ಅಬುಧಾಬಿ ಆಸ್ಪತ್ರೆಯಲ್ಲಿ ಜಗತ್ತಿನ ಮೊದಲ ITVISMA ಜೀನ್ ಥೆರಪಿ (ITVISMA Gene Therapy) ಯಶಸ್ವಿ
ಅಬುಧಾಬಿ, ಡಿಸೆಂಬರ್ 30, 2025: ವೈದ್ಯಕೀಯ ವಿಜ್ಞಾನ ಕ್ಷೇತ್ರದಲ್ಲಿ ಮಹತ್ವದ ಮೈಲಿಗಲ್ಲಾಗಿರುವ ITVISMA ಜೀನ್ ಚಿಕಿತ್ಸೆ(ITVISMA Gene Therapy)ಯನ್ನು ವಿಶ್ವದಲ್ಲೇ ಮೊದಲ ಬಾರಿಗೆ ಅಬುಧಾಬಿ(Dhabi)ಯಲ್ಲಿ ಯಶಸ್ವಿಯಾಗಿ ರೋಗಿಗೆ ನೀಡಲಾಗಿದೆ. ಅಪರೂಪದ ಮತ್ತು ಗಂಭೀರ ಜನ್ಯ ಕಾಯಿಲೆಯಿಂದ ಬಳಲುತ್ತಿದ್ದ ರೋಗಿಗೆ ಈ ಚಿಕಿತ್ಸೆ ನೀಡಲಾಗಿದ್ದು, ಇದನ್ನು ಜಾಗತಿಕ ಆರೋಗ್ಯ ವಲಯ ಮಹತ್ವದ ಸಾಧನೆಯಾಗಿ ಪರಿಗಣಿಸಿದೆ. ವಿಶ್ವದಲ್ಲೇ ಮೊದಲ ಬಾರಿಗೆ, ಸ್ಪೈನಲ್ ಮಸ್ಕ್ಯುಲರ್ ಅಟ್ರೋಫಿ (SMA) ಯಿಂದ ಬಳಲುತ್ತಿರುವ ರೋಗಿಗೆ ITVISMA ಜೀನ್ ಚಿಕಿತ್ಸೆಯನ್ನು ನೀಡಲಾಗಿದೆ. ಈ ಚಿಕಿತ್ಸೆಯು ನಿಖರವಾದ ಔಷಧ ಮತ್ತು ಜೀನೋಮಿಕ್ಸ್ ಆಧಾರಿತ ಆರೋಗ್ಯ ರಕ್ಷಣೆಯಲ್ಲಿ ಪ್ರಮುಖ ಪ್ರಗತಿಯನ್ನು ಸೂಚಿಸುತ್ತದೆ.
ಅಬುಧಾಬಿಯ ಶೇಖ್ ಖಲೀಫಾ ಮೆಡಿಕಲ್ ಸಿಟಿ (SKMC) ಆಸ್ಪತ್ರೆ ಸ್ಪೈನಲ್ ಮಸ್ಕ್ಯುಲರ್ ಅಟ್ರೋಫಿ (SMA) ಕಾಯಿಲೆಗೆ ಜಗತ್ತಿನಲ್ಲೇ ಮೊದಲ ಬಾರಿಗೆ ITVISMA ಎಂಬ ಏಕಕಾಲಿಕ ಜೀನ್ ಥೆರಪಿಯನ್ನು ಯಶಸ್ವಿಯಾಗಿ ನೀಡುವ ಮೂಲಕ ವೈದ್ಯಕೀಯ ಕ್ಷೇತ್ರದಲ್ಲಿ ಮಹತ್ವದ ಮೈಲಿಗಲ್ಲು ಸಾಧಿಸಿದೆ. ಈ ಚಿಕಿತ್ಸೆ ಡಿಸೆಂಬರ್ 28, 2025ರಂದು ಅಬುಧಾಬಿ ಆರೋಗ್ಯ ಇಲಾಖೆಯ ಮೇಲ್ವಿಚಾರಣೆಯಲ್ಲಿ ನೀಡಲಾಗಿದೆ.
ಈ ಥೆರಪಿಗೆ ಯುಎಇ ಸರ್ಕಾರವು ನವೆಂಬರ್ 25ರಂದು ನಿಯಂತ್ರಣ ಅನುಮೋದನೆ ನೀಡಿದ್ದು, ಅಮೆರಿಕದ ನಂತರ ಈ ಚಿಕಿತ್ಸೆಗೆ ಅನುಮತಿ ನೀಡಿದ ಜಗತ್ತಿನ ಎರಡನೇ ದೇಶವೆಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ.
ನೋವಾರ್ಟಿಸ್ ಸಂಸ್ಥೆ ಅಭಿವೃದ್ಧಿಪಡಿಸಿದ ITVISMA, SMA ಕಾಯಿಲೆಯ ಮೂಲವಾದ ದೋಷಪೂರ್ಣ SMN1 ಜೀನ್ ಅನ್ನು ಬದಲಾಯಿಸುವ ಮೂಲಕ ‘ಸರ್ವೈವಲ್ ಮೋಟಾರ್ ನ್ಯೂರಾನ್’ ಪ್ರೋಟೀನ್ ಉತ್ಪಾದನೆಗೆ ಸಹಾಯ ಮಾಡುತ್ತದೆ. ಇತರ ಚಿಕಿತ್ಸೆಗಳಿಗಿಂತ ಭಿನ್ನವಾಗಿ, ಇದು ಒಮ್ಮೆ ಮಾತ್ರ ನೀಡುವ ಥೆರಪಿ ಆಗಿದ್ದು, ಎರಡು ವರ್ಷ ಮೇಲ್ಪಟ್ಟ ಮಕ್ಕಳಿಗೂ ಹಾಗೂ ವಯಸ್ಕರಿಗೂ ಅನುಮೋದನೆ ಪಡೆದಿದೆ. ಇದರಿಂದ ಶಿಶುಗಳಿಗೆ ಮಾತ್ರ ಸೀಮಿತವಾಗಿದ್ದ ಚಿಕಿತ್ಸೆ ವಿಸ್ತೃತ ವರ್ಗದ ರೋಗಿಗಳಿಗೆ ಲಭ್ಯವಾಗಲಿದೆ.
ಸ್ಪೈನಲ್ ಮಸ್ಕ್ಯುಲರ್ ಅಟ್ರೋಫಿ ಅಪರೂಪದ ಹಾಗೂ ಕ್ರಮೇಣ ಉಲ್ಬಣಗೊಳ್ಳುವ ನ್ಯೂರೋ-ಮಸ್ಕ್ಯುಲರ್ ಕಾಯಿಲೆಯಾಗಿದ್ದು, ಮಾಂಸಪೇಶಿ ದುರ್ಬಲತೆ ಮತ್ತು ಜೀವಕ್ಕೆ ಅಪಾಯಕಾರಿಯಾದ ಗಂಡಾಂತರಗಳಿಗೆ ಕಾರಣವಾಗಬಹುದು. ಹೊಸ ಜೀನ್ ಥೆರಪಿಯಿಂದ ಚಲನಶೀಲತೆಯಲ್ಲಿ ದೀರ್ಘಕಾಲಿಕ ಸುಧಾರಣೆ ಹಾಗೂ ನಿರಂತರ ಚಿಕಿತ್ಸೆಯ ಅವಲಂಬನೆ ಕಡಿಮೆಯಾಗುವ ಸಾಧ್ಯತೆ ಇದೆ.
ಈ ಕುರಿತು ಅಬುಧಾಬಿ ಆರೋಗ್ಯ ಇಲಾಖೆಯ ಅಂಡರ್-ಸೇಕ್ರೆಟರಿ ಡಾ. ನೂರಾ ಖಾಮಿಸ್ ಅಲ್ ಘೈತಿ ಮಾತನಾಡಿ, “ಈ ಸಾಧನೆ ಜಾಗತಿಕ ಮಟ್ಟದ ಆರೋಗ್ಯಸೇವೆಯನ್ನು ಒದಗಿಸುವ ಅಬುಧಾಬಿಯ ಬದ್ಧತೆಯನ್ನು ತೋರಿಸುತ್ತದೆ. ಜೀನೋಮಿಕ್ಸ್ ಮತ್ತು ಪ್ರಿಸಿಷನ್ ಮೆಡಿಸಿನ್ ಕ್ಷೇತ್ರದಲ್ಲಿ ಜಾಗತಿಕ ನಾಯಕತ್ವವನ್ನು ಮತ್ತಷ್ಟು ಬಲಪಡಿಸುವ ದಿಕ್ಕಿನಲ್ಲಿ ಇದು ಮಹತ್ವದ ಹೆಜ್ಜೆ,” ಎಂದು ಹೇಳಿದ್ದಾರೆ.
ITVISMA ಚಿಕಿತ್ಸೆಯ ನಿಖರ ವೆಚ್ಚವನ್ನು ಇನ್ನೂ ಬಹಿರಂಗಪಡಿಸಲಾಗಿಲ್ಲ. ಆದರೆ, ಸಮಾನ ಜೀನ್ ಥೆರಪಿಯಾದ ಜೋಲ್ಗೆನ್ಸ್ಮಾ ಒಂದು ಡೋಸ್ಗೆ ಸುಮಾರು 2 ಮಿಲಿಯನ್ ಡಾಲರ್ ವೆಚ್ಚವಾಗಿರುವ ಹಿನ್ನೆಲೆ, ಅಪರೂಪದ ರೋಗಗಳ ಚಿಕಿತ್ಸೆಯ ಲಭ್ಯತೆ ಹಾಗೂ ವೆಚ್ಚ ಕುರಿತು ಚರ್ಚೆಗಳು ಮುಂದುವರಿಯುವ ಸಾಧ್ಯತೆ ಇದೆ.
ITVISMA ಜೀನ್ ಚಿಕಿತ್ಸೆಯ ಬಗ್ಗೆ :
ITVISMA ಎನ್ನುವುದು ಅಪರೂಪದ ಜನ್ಯ (genetic) ಕಾಯಿಲೆಗಳಿಗೆ ನೀಡಲಾಗುವ ಅಧುನಿಕ ಜೀನ್ ಚಿಕಿತ್ಸೆ. ITVISMA ಎಂಬುದು ನೊವಾರ್ಟಿಸ್ ಅಭಿವೃದ್ಧಿಪಡಿಸಿದ ಮುಂದಿನ ಪೀಳಿಗೆಯ ಜೀನ್ ಚಿಕಿತ್ಸೆಯಾಗಿದೆ. ಇದು ಬೆನ್ನುಮೂಳೆಯ ಸ್ನಾಯು ಕ್ಷೀಣತೆಯ ಆನುವಂಶಿಕ ಕಾರಣವನ್ನು ನೇರವಾಗಿ ಗುರಿಯಾಗಿಸುತ್ತದೆ. ಇದರಲ್ಲಿ ರೋಗಕ್ಕೆ ಕಾರಣವಾಗಿರುವ ದೋಷಪೂರಿತ ಜೀನ್ನ ಕಾರ್ಯವನ್ನು ಸರಿಪಡಿಸುವುದು ಅಥವಾ ಅದರ ಪರಿಣಾಮವನ್ನು ಕಡಿಮೆ ಮಾಡುವುದೇ ಮುಖ್ಯ ಉದ್ದೇಶ.
ಜೀನ್ ಚಿಕಿತ್ಸೆಯ ಮಹತ್ವ :
ಜೀನ್ ಚಿಕಿತ್ಸೆಯಲ್ಲಿ ಕಾಯಿಲೆಯ ಲಕ್ಷಣಗಳಿಗಲ್ಲ, ಅದರ ಮೂಲ ಕಾರಣವಾದ ಜನ್ಯ ದೋಷವನ್ನೇ ಗುರಿಯಾಗಿಸಲಾಗುತ್ತದೆ. ಇದರಿಂದ ದೀರ್ಘಕಾಲದ ಪರಿಹಾರ ಸಾಧ್ಯವಾಗುವ ನಿರೀಕ್ಷೆಯಿದೆ. ITVISMA ಚಿಕಿತ್ಸೆಯು ಅಪರೂಪದ ಜನ್ಯ ರೋಗಗಳ ಚಿಕಿತ್ಸೆಯಲ್ಲಿ ಹೊಸ ಯುಗಕ್ಕೆ ನಾಂದಿ ಹಾಡಿದೆ ಎನ್ನಲಾಗಿದೆ.
ಭವಿಷ್ಯದ ನಿರೀಕ್ಷೆ :
ಈ ಸಾಧನೆಯಿಂದ ಮುಂದಿನ ದಿನಗಳಲ್ಲಿ ಇನ್ನಷ್ಟು ಜನ್ಯ ಕಾಯಿಲೆಗಳಿಗೆ ಪರಿಣಾಮಕಾರಿ ಚಿಕಿತ್ಸೆ ಲಭ್ಯವಾಗುವ ಸಾಧ್ಯತೆ ಇದೆ. ಆದರೆ, ಚಿಕಿತ್ಸೆ ದುಬಾರಿ ಆಗಿರುವುದು ಮತ್ತು ಸೀಮಿತ ವೈದ್ಯಕೀಯ ಕೇಂದ್ರಗಳಲ್ಲಿ ಮಾತ್ರ ಲಭ್ಯವಿರುವುದು ಸವಾಲಾಗಿ ಉಳಿದಿದೆ. ಒಟ್ಟಿನಲ್ಲಿ, ITVISMA ಜೀನ್ ಚಿಕಿತ್ಸೆಯ ಯಶಸ್ವಿ ಬಳಕೆ ವೈದ್ಯಕೀಯ ವಿಜ್ಞಾನದಲ್ಲಿ ಐತಿಹಾಸಿಕ ಹೆಜ್ಜೆಯಾಗಿದ್ದು, ಲಕ್ಷಾಂತರ ರೋಗಿಗಳಿಗೆ ಹೊಸ ಬದುಕಿನ ನಿರೀಕ್ಷೆ ಮೂಡಿಸಿದೆ.
- ಜಾಮೀನು (Bail) ಮತ್ತು ಪ್ಯಾರೋಲ್ (Parole) ನಡುವಿನ ವ್ಯತ್ಯಾಸವೇನು..?
- ಹೆಮ್ಮೆ, ಧೈರ್ಯ ಮತ್ತು ಸ್ವರಾಜ್ಯದ ಪ್ರತೀಕ ‘ಶಿವಾಜಿ ಮಹಾರಾಜ್ ಜಯಂತಿ’
- ಪ್ರಚಲಿತ ಘಟನೆಗಳ ಕ್ವಿಜ್ (11-02-2026)
- KMF ಶಿಮುಲ್ನಲ್ಲಿ 194 ಹುದ್ದೆಗಳ ಭರ್ತಿಗೆ ಅರ್ಜಿ ಆಹ್ವಾನ
- HALನಲ್ಲಿ 51 ತಾಂತ್ರಿಕ ಮತ್ತು ಇತರ ಹುದ್ದೆಗಳ ಭರ್ತಿಗೆ ಅರ್ಜಿ ಆಹ್ವಾನ
